Cannavaro: Yanga inaweza kuchukua ubingwa wa mapinduzi

Kapteni wa Yanga, Nadir Haroub ‘Cannavaro’, amewapoza mashabiki wa timu yake kwa kuwaambia watulie kwani wao wachezaji wamejipanga kutwaa ubingwa wa Kombe la Mapinduzi mwaka huu.

Cannavaro ametoa kauli hiyo wakati mashabiki wa Yanga wakiwa na kumbukumbu ya kufungwa mabao 2-0 na Mbao FC katika mchezo wa Ligi Kuu Bara uliochezwa wikiendi iliyopita.

Beki huyo hakuwa sehemu ya kikosi cha Yanga ambacho kilifungwa na Mbao kwenye Uwanja wa CCM Kirumba, Mwanza.

Cannavaro aliyedumu kikosini hapo kwa zaidi ya miaka kumi, amesema kuwa wamepanga kuwafuta machozi Wanayanga kwa kutwaa Kombe la Mapinduzi.

“Najua kwamba mashabiki wetu wana hasira na sisi baada ya kile kipigo tulichokipata kutoka kwa Mbao, lakini nawaambia tutawafuta machozi kwa kuchukua ubingwa wa Mapinduzi msimu huu.

“Tumejipanga na tumedhamiria kuchukua ubingwa huu na hilo linawezekana, pia tutatumia michuano hii kama sehemu ya kujiandaa na ligi pamoja na michuano ya kimataifa,” alisema Cannavaro.

Yanga kwa sasa wanafundishwa na makocha wasaidizi, Noel Mwandila na Shadrack Nsajigwa ambao walianza kampeni yao ya Kombe la Mapinduzi Jumanne hii kwa kuifunga Mlandege mabao 2-1 katika Kundi B.

Halafu juzi usiku ikaifunga JKU bao 1-0 na jana usiku ilicheza na Taifa Jang’ombe.